كأنك سعيد.. كأنك أم أو أب..كأنك محبوب أو بتحب.. كأنك حر .. وفي بلدنا كأنك إنسان .. كل شيء حواليك بيخليك كده وكده.. نص من حاجة وفتفوتة من حاجة.. حلمك ممكن تاخد منه فتفوتة .. إبنك صورة إبن ..عايش لنفسه ومابيعرفكش إلا لما يقع في ورطة أو يحتاج فلوس.. شغلك صورة شغل.. حتي المشاعر اللي جواك مابتخرجش منها إلا فتافيت.. ماتقدرش تصرخ بجد وإلا تبقي مجنون ..ولا تفرح زيادة وإلا تبقي مابتحسش باللي حواليك..ولا تقدر ثقول رأيك في أمور بلدك اللي بتمس صميم حياتك لأنك ممكن تعتقل .. ولا ترفض حب حد بيحبك لكن خانقك لأنه أناني مابيعرفش يدى الا الفتافيت وانت نفسك استثنائى لأنك بتدي كل حاجة حتى وانت نفسك ماتديش بتدي .. ولاتقبل حب حد ممكن يسعدك بجد لأنه شخص بشكل ما غير لائق اجتماعيا.. مطلوب منك تفهم العالم انك سعيد وانت بتتوجع لأنك طول حياتك ما أخدتش شيء كامل كل حاجة ناقصة كتيير.. كل حاجة مربوطة بسلاسل ومردومة تحت مشاعر ظلم.. ومطلوب منك في الآخر تستني الموت وكأنك عشت.. مشاعر مالهاش حل.. يمكن لأننا أضعف من إننا ناخد خطوات حاسمة ومصيرية ..أو لأننا أكثر طمعا من أن نرضي بالقضاء ..أو أقل حكمة من أن نتعامل مع الحياة علي انها مرحلة ..مجرد مرحلة .. ويمكن ساعتها نقدر نعيش..بس برضه موش بجد
ليست هناك تعليقات:
إرسال تعليق