زرع

 وكأني باتهحى الكلام

وارمي الحروف مبعترة

تتلم وتنبت سلام

وتفض ليل المحزنة

قلبي مع الغيمة اللي جاية محملة

عصافير كناريا وسربين للحمام 

 يلمع قزاز شباكي م المطر الحنون

ويعود كلام الود وزهور الغرام 

كأني باتهجى الحياة من البداية للممات

وارمي على الأرض اللي قاتلها السكات

 من  فولها حبة ومن قمحها شويات 

تتهز تحضن وِلٌدها  وتحنكه البلحات

وتصر فى خزاين الأمل سبع حبات

يكبر فيزرع حبة ويبعت الرحمات

للى زرع  ما قلع فى احلك اللحظات

صباحك

 صباحك  يشرف ياعاشق بهية

صباح كلمة حلوة بتمحى الخطية

صباح قلب عاشق لبلدي الصبية

غناه لون ورودها صابحة وندية

صباحك منور بشمسه العفية

بيطوى المواجع ويمحى الأسية

صباح كلمة صادقة حنونة وأبية

وإيد واد بيزرع شديدة وسخية

صباح زي قلبك ياعاشق بهية

ح ر ي ة

 ‏قالت:

- أنا وطن هجرتك منه غير مشروعة

اجابها متلعثَما:

-  وطن لا يرضى باختلافي، ولا يمنحني أنفاسا للحرية، ولا يعترف بحاجتي للتداوي من فرض وصايته

بكت:

_ لا تغادر

خانته دموعه:

_ لا تخافي، سأصبر حتى أتعافى وسيعيدني كل هذا العشق الذي لا حيلة لي معه

نظرت بغضب:

-وقتها لن تكون أنت.. ولا أقبل بمن يقول لا

                                              نفيسة عبد الفتاح

جنازة

  هو خلاص كده آخرتي ؟!

مولود رجعت للفتي

وبدل ما اغنى للحياة

 جه امر حاسم: أصمتي

 صوت الدعا وندا لصلاة .

في دقيقة طالعة زفتي

 فوق كتف عمره ماكان سند

 ولا مرة داوى  كسرتى

بدهشة سامعة صوت بكاه 

وكأنه من عالم بعيد

ماعادش يفرق لو حزين 

أو سابك الدور الجديد

شنطة سفر

شنطة دوا ..

 وحبة حاجات رفيعة
كتاب قديم ..

 كان أغلى جايزة كسبتها 

صورتي في طابور المدرسة 

وأبلة نادية في طرفها

 كلامها بيرن في وداني:

 _صوتك موسيقى بحبها

 وبروازين
لورد مشغول ع القماش

كتير باحسه ورد حي 

 كان كله معمول بالبلاش

لكن شغله كان بقلب 

ورويته حنية فعاش

بيغني وانا باسمع غناه

كأن عاشق حط من روحه حياة

الشنطة فيها إيه مهم

 يستاهل الحزن اللي بيفتح دفاتره!

ودموعي فارشة ع الخدود صيوان وداع !

حكايات قديمة باتهجاها دمعة دمعة 

خمسين سنة وفوقهم تمانية

يمكن عيونك ابلة ليلى اللي ما اعرف أرضها

 كانت بتضوي وتجلي روحي لما بالمس الكتاب

يمكن دوا قلبي اللي نبضه مهزوم من صباه 

ولا الورود اللي اما كنت بابوح لها

تاخدني مني وتحلى منها الطبطبة 

وعطرها ياخد بإيدي للكورال والمكتبة

ماعرفش إيه اللي كسرني

خلاني دبلانة قوي

وكأني باستني القدر 

يختم حياة.. كانت حياة.. 

في شنطة سفر 

كان

و..

كان مرة عندنا ثورة

وغولة ياغولة يادولة

غويطة واحنا لاحول
 قفلت عينها الحمرا

عملت قال إيه نايمة 

و.. هتف الواد العترة
و..معاه البنت الوردة

ياقلوب بالحب معاهدة 

رشقولها عيونها بطلقة

و..

قامت الغولة القادرة

وشربت دم الشهدا

و..

كان مرة عندنا ثورة 

كان مرة عندنا ثورة

روح

التأمت ندبات حزن قديمة.. تلاشت بقعة كبيرة سوداء لغضب عاصف.. كانت تنسحب مع نور يصعد من قدميها باتجاه الرأس..تنظر عبر  جسد شفاف لقلب عاد جديدا..ولا تدرى هل تولد أم تموت