تحريض

بتحرضينى ع الغنا؟! طب ليه؟!.. موش برضه  بتقولي حرام؟!.. 

لما الغنا يبقي حرام .. والكلمة تتحول عريضة لاتهام .. والمعني يتلفلف لفايف.. ونوره يتحول ظلام .. واما البريء يموت فطيس.. في محاكمة ممنوعة الكلام..واما اللى يعلا  ابن الحرام.. يبقي السكات موت وانهزام..

 بتحرضيني ع الغنا؟!.. وتدارى وشك مننا! وكأننا ماحناش عيالك القدام..اللى انسقوا في حضنك أمان.. خايفة الرصاص ياحلوة يصطاد الحمام .. وبتعملي موش عارفة شىء عننا.. وتلمى في المجاريح وتداوى الآلام..وكأننا بنلعبها لعبة من زمان .. عايزانى دايب في الغرام.. مغنايا بتولع شوارعك.. وتصحي للثورة اللي نام..  واما اللي حاكمك يرفع النبوت .. تقولى ع المغنى حرام..تقولى ع المغنى حرام؟!

وبعدهالك

وبعدها ياحبيبتى ..وبعدها في سكاتك ..قلبي  اللي حب جمالك .. بيموت  ولا علي بالك .. بيقطعوا شرايينه ويبيعوا فيها قصادك .. قلوب عداكي ماتت يحيوها ليه باولادك .. وبعدها ياحبيبتي يرموا الشبك في بحارك .. يصطادوا خيرك شروة.. ويبوروا في غيطانك ..ويقطعوا من لحمك ويقفلوا في بيبانك .. لا نلاقي حضن يساعنا ولا تعلي راس في ميدانك ..وبعدها ياحبيبتي ..وبعدها في سكاتك ..

خللى لى بالك

وانت بتحلم للوطن وانت بتكتب ع الحيطان 
اسم اللى مات و انجرح واسم الخسيس الألعوبان
فاهم معانى اللى انت فيه حافظ حكايات اللى كان 
صلب وعنيد كما الجبل وفيك خضار زرع الغيطان
وانت بتحلم للوطن خلى لى بالك ع المكان
خللى لى بالك ع البنا اللى بناه جدك زمان
أحرس تاريخك واحفظه واحفظ لأمك الأمان