الضرب فى الميت

سبحان من له الدوام. 
لحلوح وكان 
بيلحلح الحال المكعبل 
ويزق زقة للأمام. 
ياما أستكوه وفرتكوه وطيروه 
وقالوا جندي عليه كمان
بس الفقيد .. بصراحة عمره فى يوم ماعام.
لما نزل من غير إحم
ضبش ثواني
وبعدها نصبوا الصيوان.
والرحمة جايزة ع اللى مات من غيرمايوه
واللى مات فطيس ياكبدى بضربة قاضية من دولار
ألف رحمة عليك يا أهيف
ألف نور واقطع كلام..
فقيدنا مات من غير وصية 

واللى قتل عاش فى سلام
واللى هاينطق م الساعة دى ..
هانقولها واضحة ولا ملام
خلاص ياسيدى ..خلاص ياعمى
دا الضرب في الميت حرام