فواصل

أتوكأ على قلبه الطيب .. دائما مايقول لى: هونى عليك .   أحاول ان اتناسى هموم الدنيا ومتاعب الخلق التى تقذفها فى وجوهنا الصحف وبرامج التوك شو  والوجوه التعسة فى الشوارع ومشاكل الأولاد والعائلة.. بعض المناسبات تكون حقا سببا فى غلبة مشاعر التفاؤل.. أشترى كعكة عيد ميلاده وأقرر أن أمنحه بهجة لطالما جاد على بها.. لا تمنحنى نزلة البرد الشرسة التى هاجمته الفرصة..أزداد حزنا..ضنينة هى الحياة  ..ينهض متحاملا..ينظر فى عينى الحزينتين.. وبينما يضىء شمعتة بيد مرتعشة  ..يفاجئنى بدعابة قرأها وننخرط فى ضحك من القلب تتخلله فواصل من موسيقى سعاله

قشرة

حد بيسأل: إنت بخير؟.. فاكر إنى بامر بأزمة.. م الأحمال حزمة ورا حزمة، مابقاش باقى لإنى أنخ، إلا يادوبك نتفة قشة ..  ..كان قلقان م الدمعة السخنة ..وهمسى  المر فى آخر صدمة..وجسمى اللى بيعلنها بقسوة ..انا موش قادر على أحزانها.. حد بيسألل : إنت بخير؟..أيوة بخير..هى بلادى وهى الصحبة..وحاسة كأنى باعيش فى الغربة .. مليون فكرة بعد السكرة..مليون حلم ماتوا فى لحظة..لكن جد ..أيوة بخير.. ثقتى بربى شريان  قوة..  طاقة صالبة  العود من جوة ..والأحزان دى مجرد قشرة    

ياريتها دامت

ياريتها دامت كام خرطوش
وشمتين غاز فى النخشوش 
ونور بشمعة ..وحما بالكوز 
ولا كان خرج لى عجوز ولصوص
30 سنة تنهشوا ياوحوش
وتمصمصونا ضهر وبوز
وآخرها دم يروح بلوش
والورد يترصص فى نعوش
وابن اللئيمة محامى ماجوس
يضحك على الشعب المكبوس
ويؤش للواد المحروس
وابوه ولمة الأراجوز

أنا ملو قلبى صور ووشوش
كل اللى عاشوا مابينسوش
لو  حد بينهم مات مدهوس
أو صفوا عينه أو مقفوش
لو  جار قريب مات منشوش
 وحسرة امه تهد عروش
على عود خضاره بات ممصوص
والمجرمين بيربوا كروش
صابغين شعور ربوا المقصوص


قال إيه صرخنا حلق حوش
فلحوا الغلابة وصادوا قروش
زغروطة دا المجرم محبوس
وسع وفضى ياواد الحوش 
بكره بفلوسنا يبات مفروش
وفطارنا يبقى كباب وقاروس

 أتارى ليلنا حلمه فاشوش

عيش الغلابة حديد مجروش 
والفولة عايزة حمل فلوس

من بنك كتم ع المكبوش
لشعب عاش وهم الفنكوش
لا شق صدر نفع متعوس
ولا الجنان والسير منكوش
والوقفة فى الإشارات بكازوز
مات الصريخ جوه الميادين
ظالم  برىء وبرىء مخروس
ياريتها دامت نوم الاسفلت
ياريتها دامت كام خرطوش

لا عودة ..مع تقديرى

خسرت اليوم صديقا .. يعلم الله كم كنت أقدره ..الأسباب ! .. لكن بعض الثقوب تستعصى على الرتق حقا..دعونا نختلف فى رؤانا السياسية للوضع الراهن .. دعونا نرفض أو نقبل فالاختلاف علامة صحة عقلية ونفسية ..لكن لا تدعونا نخسر أجمل مافينا، بتعنت كل منا لرأية وإصراره على فرضه ..شىء واحد فقط  يستحق موقفا حاسما، أن يظن من على أيديهم دماء أو يروجون للفتن أو يزرعون الموت فى الطرقات للبسطاء ولكل أفراد الشعب بما فيهم جنود الجيش والشرطة ..أن مابيننا وبينهم خلاف فى الرأى ..هذا خلاف جذرى فى مصير وطن، ولا يمت للرأى بصلة.. شكرا صديقى  فرغم اختلافنا سأحترمك دائما..ورغم كل ما أحمله من وجع ومرارة..فلن اقبل أن تعود صديقا لأن من يضحى بى لخلاف فى الراى لا يستحق صداقتى

خسارة

أنا ويا صاحبى بادوس كرامتى لحين.. وامد صبرى ع المدى فدادين ..واقوله عذرى وافول معاه عذرين..غلطان فى فهمه وفلبه منى حزين ..آخر المتمة بابى قفله متين .. ماينفتحله ولو هايبكى سنين .