صباح النور ع الولد
على أحلى حد فى البلد
صباح الخير يابلد
شفتيه بجد دا الولد؟
مليتى عيونك منه
ومسحتى بكفك دمه
وكتبت كتاب على اسمه
يحفظ أحلامه ورسمه
مكتوب فيه انه حبيبك
مكتوب فيه انه سند
فى ميدانك شد احلامك
وعمل من نفسه وتد
صباح النور يابلد
الشمس اهى طلعت تانى
من بعد غياب تلاتين
بس الشمس المرة دى
نورها متلضم فيه
قلوب ورد وياسمين
وقَّفوا مغنى الشيخ سيد
وفى لحظة راحوا ساجدين
تراتيل تسابيح ترانيم
بإيمان مالى الشرايين
وبروح بتشع طهارة
بتغذى القلب يقين
بالنور يملا البلد
صبيان وبنات فى الزفة
ضحكتهم طعمها نيل
والإيد فى الإيد ماسكين
وعيونهم لامعة ذكاوة
رايحين وموش راجعين
قعدتهم جابت بكره
وروحتهم سايبة أنين
الواحد منهم ماشى
بيقول انه اتولد
بيرش الصبح علينا
سايب نوره لبلد
ليست هناك تعليقات:
إرسال تعليق