ختم المسك
شعر:نفيسة عبد الفتاح
لما انشق النور ألوان
فى القوس على حرف الشلال
والجنة يادوبك ع الحد..
واما ضفاير المية الصافية
اتلضمت بالنور على المجرى
وانبدرت من حضن السد
فتح خد صبية بوردة
على العود الملفوف عينى
باردة
والشجر اتلون بالسعد
نوار قطنى النبى حارس
والخيل رماحة بفوارس
وضروع فى حليبها..قول
شهد
واما انحبس الطمى أبو
خير
المتعافى لعز الأرض
شربه النيل فى عروقه
وشد
عشق فى الأرض الشرقانة
ماهانتش الزرعة الدبلانة
ولا هان الاسمر يحنى
القد
منه القلب ابو شوق لحبيبه
بيوفى عهوده ويبسط إيده
ووقت الشدة يسد بجد
منه أغانى الناى ع الساقية
وضفيرة البنت العكروتة
والحدوتة
والسهراية لما تمد
منه عقود الفل فى صدرى
وسكر تمرى وحنة كفى
والبلطي بيلعب فى الطرد
منه..طبع الطيب،دمعه
قريب
آه لو يرضى وآه لو يغضب
وحكم كبيره مالهوش رد
منه الفرعون المتكابر
والسحرة تسجد وتآمن
وقمح عزيزه ماجوع حد
لما انشق النور ألوان
فى القوس على حرف الشلال
والجنة يادوبك ع الحد
كانت..حد حدوده
وآجمل بدرة رمتها كفوفه
وختم المسك
كانت مصر..أكيد..ولابد 
ليست هناك تعليقات:
إرسال تعليق